Ұстаз болу-жүректің батырлығы,
Ұстаз болу-сезімнің ақындығы,
Ұстаз болу-мінездің күн шуағы,
Азбайтұғын адамның алтындығы.
Ғ.Қайырбеков
Өмірде мамандықтың сан-алуан түрі бар. Әр мамандықтың ерекшелігі бар. Наубайшы нан пісіреді, құрылысшы ғимараттарды тұрғызады, кенші пайдалы қазбаларды жер қойнауынан қазады. Кез келген мамандықты жеткілікті игеру үшін көп оқып, дайындалу қажет. Меніңше, сол көптеген мамандықтардың ішінде жан-жақты білімділікті, икемділікті, шеберлікті, ерекше мейірімділікті қажет ететін мамандық - ұстаздық мамандық. Мұғалім басқа сала мамандықтарына қарағанда, ең қиын, ең ізгілікті мамандықтардың бірі. Себебі басты міндет, ең әрі маңызды мәселе - жас ұрпаққа терең білім мен сапалы тәрбие беру. Мұғалімдер барлық мамандық иесін тәрбиелейтін, оқытып үйрететін абзал жандар.
Мен осы оқу жылы бастауыш мектепті бітіріп, бесінші сыпыпқа көштім. Мектебімді ауыстыруыма тура келді, өйткені мен кадет сыныбына барамын деп бел будым. Басында біраз сұрақтар мені мазалады: жаңа мектеп, жаңа сынып, жаңа мұғалімдер.... Бәрі жаңадан, өзгеше, қалай болады екен деп қобалжыдым. Алайда, ата-анам мені қолдап, «мектеп сенің екінші үйің, ұстаздар сол үйдегі жақын достарың» деп мені жұбатты. Расында да, мектепке кіргеннен-ақ, мазалаған сан түрлі ойлардан арылып, өзімді ерекше сезіндім. Өйткені мені қарсы алған мұғалімдер бірден жүрегімді жаулап алды. Мектеп атты үлкен орданың есігін имене ашып, жүрегім дүрсілдеп кіргенде, алдымнан мейірлене күліп, жылы жымиған мұғалімдер қарсы алды. Біздің мұғалімдеріміз бойындағы бар ерік-жігерін аямай, білім әлеміне қызықтырып, оқытып қана қоймай, өнерге де жанын салып үйретеді. Орыс тілі мен әдебиетінің мұғалімі бізді көркемсөзді дауыс ырғағын келтіріп, мәнерлеп оқуға үйретсе, еңбек оқытушысы өзінің сабақтарында әдемі заттарды жасауға, оюлар оюға үйретеді, қазақ тілі мұғалімі ойымызды мемлекеттік тілде жеткізуге үйретсе, сынып жетекші мен офицер-тәрбиелеуші мектепте өтетін барлық шараларға бізді әзірлеп, баға жетпес кеңестерін беріп отырады. Менің ойымша, біздің мектептегі мұғалімдердің көбі өз мамандығын жүрек қалауымен таңдаған. Өйткені, олар өзінің бар күнін, бүкіл өмірін бізді тәрбиелеуге, бізге терең білім беруге сарп еткен періштелер. Мұғалімдердің арқасында біздің санамыз өседі, азамат болуға ұмтыламыз, осы жолдағы алдымыздан шығатын кедергілерден сүрінбей өтуге, алға қойған мақсатымызға жету үшін күресуге де үйрететін тұлғалар - ұстаздарымыз!
Қазіргі кезде мектеп менің сүйікті ортама айналды. Дәл осы жерде мен ұстаздарыммен талай түйінді күрделі мәселелерді шешіп, көп нәрсеге көз жеткізіп, өзіме таңдау жасап, өмірлік кеңес алатын қасиетті орынға айналатына нық сенемін! Менің мұғалімдерім білмей қалсам кешіретін, балалық деп түсінетін, қол ұшын созып, қолдау көрсететін асыл жандар!
