Отаным десем ойыма...
Түсер еске ақсақалды қариям,
Туған жерім - құт мекенім дариям.
Егеменді, туым, әнұран,
Қанатымды қағып ұшқан жанұям.
Түсер еске Махамбеттей батырлар,
Осы жолды аңсап еді ақындар.
Отанымның ар намысты киесі,
Мен сүйетін қалың қазақ, халқым бар.
Менің Отаным – Қазақстан-
деп ақындар жырлағандай, менің Қазақстаным - ұлан байтақ, кең дала. Бейбіт ел. Жасыл жайлау, төбесі көкке жететін таулар, терең теңіздер, көгілдір көлдер мен өзендер.
Осындай таң - тамаша табиғатымыз айбалтадай жарқыраған аймүйізді арқарлар, егіздеп - сегіздеп өрбіген еліктер, маңғаз құлан, бұландар, кербез керіктер, желдей жүйткіген жүйрік киіктерімізбен одан әрмен көркейіп, табиғатымыз жарастығын жалғастыруда. Айдын шалқар көлдеріміздегі жүзген аққу құстарымыздың сұңғақ мойындары, әдемі аппақ қанаттары мың бұралған бейне бір бишілеріміздей елестесе, ну ормандар мен жасыл желектерге қиқулап, шықылықтаған сан алуан құстарымыз әсем табиғатымыздың сұлулығын әншілерімізбен бірге жырлағандай сезімде боламыз.
Мен өз Отанымды мақтан тұтамын. Табиғаты қандай тамаша! Менің Қазақстанымның көркіне жететін ел жоқ десе де болады.
Қазақстаным – бай, қуатты елдердің бірі. Ең басты байлығымыз -
2724,9 мың км² созылған ұлан - ғайыр жеріміз. Сондай - ақ Жер Анамыздың елге беріп жатқан көл - көсір өнімі.
Адам денсаулығына пайдалы жасыл желектер, хош иісі аңқыған қызыл - жасыл гүлдеріміз бен емдік қасиеттері мол әр түрлі өсімдіктер де менің Отанымның жерінен табылады.
Біздің елімізде егін шаруашылығы, мал шаруашылығы жақсы
өркендеген. Сонымен қатар пайдалы қазбалар, есепсіз байлық өте көп. Ақ алтын, қара алтын т.б. пайдалы қазбалар өз елімізде өңдіріліп қана қоймай, экспорт ретінде көршілес мемлекеттерге де көмектесудеміз. Мұның бәрі менің Отанымның байлығы, кескін - келбеті, тамаша табиғаты. Олай болса менің Отаным бай - қуатты, келешегі кемелді, құрметті, құдіретті бай өлке деп бекер айтпаған екенбіз. Осындай құдіретті бай өлкемізде өзімізбен қатар орыс, ағылшын, түрік т.б. өзге ұлт өкілдері де қоныстанған.
Қазақстаным - көп ұлттың мекені. Ата - бабаларымыз тілі де, діні де басқа адамзаттың баласын ақ, сары, қара деп жатсынбай бауырына баса білген. Әр ұлттың баласы бір шаңырақтың астына бірігіп, береке - бірлігі айрандай ұйыған, тату - тәтті бейбіт елге айналуы, ақ көңілді, кең пейілді, жылы жүректі, дархан мінезді бауырмал қазағымның арқасы.
Осылайша кемеңгер, көсем Елбасымыз Н.Ә.Назарбаевтың басшылығымен ақ ниетті, адал жүректі, бірлігі жарасқан менің Отаным үлкен Тәуелсіз Қазастанға айналып, барша әлемге танымал болып отыр. Олай болса, Отанымыздың Тәуелсіздігі тұғырлы, бейбітшілігі ғұмырлы болсын ағайын!
Көшбасшымыздың ендігі мақсаты Тәуелсіз елімізге Елорда бекіту еді. Сөйтіп, 1998 жылы 10 маусым күні Арқаның төріндегі сылдырап аққан ерке Есілдің жағалауында орналасқан айбынды Астанамызды Елорда ретінде бүкіл әлемге паш етті.
Еліміздің намысшыл, ойшыл ұлдары мен қаһарман қыздары қазақ елінің болашағы үшін барын сала еңбек етті. Осындай елеулі, еселі еңбігіміздің нәтижесінде айбынды Астанамыз жарық жұлдыздай жарқырап, күннен - күнге құлпырып, көркейген, гүлденген Астанаға айналды. Айдай сұлу, күндей көркем Астанамызды тамашалауға алыс - жақын елдерден, тіпті шет елдерден келетін қонақтар да аз емес.
Сөйтіп, аз ғана уақыттың ішінде көрсе көз тоймайтын көрікті Астанамызды, Тәуелсіз Қазақстанымызды басқа мемлекеттерден кем еместігін насихаттау барысында ЭКСПО - 2017 көрмесі ұйымдастырылды. Ғылым мен білімнің ордасына айналған көркем Астанамыз қонақтардың көңілінен шығып, ЭКСПО көрмесі өте жоғары деңгейдегі бағалауға ие болды. Астана - Қазақстанның жүрегі. Ол мәңгі елім деп соғады деген тұжырымды дәлелдеді.
Жарқырап жайна берші, сен Астана,
Өзіне арналады ән де Астана.
Қашанда саған іңкәр менің жаным,
Жастықтың жалауы бол, сен Астана!- деп әнші Алтынай Жорабаева әнге қосқандай, Астана қаласының 20 жылдығына арнайы тілегімді осылай білдіргім келеді.
Өз шығармамды Елбасымыз Н.Ә.Назарбаевтың сөзімен қорытындылағым келеді: «Еліңнің ұлы болсаң, еліңе жаның ашыса, азаматтық намысың болса, қазақ елінің нығайып, көркеюі жолында жан теріңді сығып жүріп еңбек ет! Жердің де, елдің де иесі өзін екенін ұмытпа!»
Біз Елбасымыздың елім, жерім деп жариялаған үндеуін мәңгі құрметтеп, бұлжытпай орындаймыз. Отанымыздың аспаны ашық, әр таңы арайлы, болашағы нұрлы болса екен деп тілеймін.
Қазақстан! Туды алтын дәуірің,
Алғандайсын жұлдыздардың жарығын.
Көк байрағым желбіресін төрімде,
Бейбітшілік орнасын тек елімде!
