Ақырын жүріп, анық бас
Еңбегің кетпес далаға,
Ұстаздық қылған жалықпас
Үйретуден балаға.
Абай Құнанбайұлы
Ұстаз деген ұлағатты сөзді естігенде, менің тұла-бойым шымырлап, ерекше күйге бөленемін. Себебі, ұстаз ұғымы мен үшін қастерлі, қасиетті, киелі. Қолға алғаш қалам ұстатқан, аяулы анамдай болған ұлы адамның арқасында жазу,сызуды танып, білімге деген сүйіспеншілігім пайда болды. Алғаш мектепке қадам басқандағы алғашқы ұстазымның жарқын бейнесі, алқызыл гүлдерге толған ыстық құшағы, жылы жүзі,сөйлеген әдемі сөздері, бәрі, бәрі түгелдей есімде. Маған ақылшы бола білген, қиын сәттерде дұрыс шешім қабылдауды үйреткен ұстазымның есімі – Айгүл Мұқиева.
«Ұстаз – мектептің жүрегі» демекші, ол – ардақ тұтар тұлға, адамның жанын байытатын, рухани азықтандыратын ұлы адам.
Ғалым да, шахтер де бас иетін,
Ұстазым, бар сенің қасиетің
Білім берген, ой берген, ақыл берген,
Көз алдымнан кетпейді асыл бейнең, – деген өлең жолдары менің сүйікті ұстазыма арналғандай. Расында, шахтер де, ғалым да, кез келген маман иелері де ұстаздан білім алады. Әлемдегі ең қасиетті, сауапты, қызығы мен шыжығы бірге жүретін, ең ауыр жүкті арқалаған ардақты ұстаздардың еңбегі орасан зор. Алтындай уақытын шәкірттерінің білімі мен тәрбиесіне жұмсаған, әр баланың болашағына бағдар берген ұстазым маған әрдайым өз ақыл-кеңесін айтып отыратын. Ол былай дейтін: «Шырмауы көп мына өмірде екі жол болады. Біріншісі оңай жол. Бұл еңбексіз, білімсіз жол. Осы жолды таңдасаң, өмірдің мәні болмайды. Екінші жол – қиын жол. Басында тағдырдың тауқыметін тартып, қиын белестерден өткенмен, бірақ соңында мұратқа жетесің. Бұл – білім, еңбек жолы. Сондықтан, білім ал, еңбектен, шаршама. Білімді адамның жолы әрқашан ашық болады». Менің дұрыс жолды таңдауыма ұстазымның қосқан үлесі сүбелі деп ойлаймын. Себебі, мен білім жолын таңдадым. Мақсатым айқын, болашағым жарқын болатынына сенемін.
«Шәкіртсіз ұстаз - тұл» дейді дана халқым. Сізден түлеп ұшқан шәкірттер үмітіңізді ақтап, биік-биік белестерді бағындыратынына кәміл сенемін. Айгүл апай, сіздің берген құнды біліміңіз, бойыма дарытқан асыл қасиеттеріңіз, өміршең ақылдарыңыз – нағыз ұстаз бере алатын ұлы істер. Сіздің жарқын бейнеңіз жадымда мәңгіге жаңғырып тұрады. Өз ойымды мына өлең шумақтарымен тәмамдасам деймін:
Ұстазым менің, ұстазым,
Өзіңмен өткен қыс-жазым
Қалдырған ізің мәңгілік
Жадымда тұрар жаңғырып,
Ұстазым менің, ұстазым!
