Қор нарығында қаржылық құралдардың өтімділік деңгейінің проблемасы және проблеманы шешу жолдары мақаланың өзектілігі болып табылады. Теориялық негізі ретінде отандық және шетелдік қор нарықтарының маңызды көрсеткіштері, аналитиктердің болжамдары қолданылды. Одан бөлек, мақала жазу барысында пайдаланылған талдаудың сандық, статистикалық әдістері және парето әдісі негізін құрған болатын.
Түйін сөздер: өтімділік, сауда-саттық көлемі, капитализация, акция нарығы.
ТМД елдері арасында жетекші орындардың бірін иеленетін Қазақстан қор биржасы өз кезегінде дамыған елдердегі ірі биржалардан әлі де артта қалып отыр. Оның басты себептерінің бірі – өтімділік деңгейінің төмендігі. Бұл термин қандай да бір биржалық қаржылық құралды тез сатып алу немесе жылдам сату мүмкіндігін білдіреді. Өтімділіктің негізгі индикаторы – сауда көлемі. Сауда-саттықтың ірі көлемі нарық қатысушыларның қаржы құралына қызығушылығының бар екенің көрсетеді. Сауда көлемі неғұрлым жоғары болса, биржалық құралдың өтімділігі соғұрлым жоғары болады және сәйкесінше қор нарығында әрекет ететін субъектілер арасында қаржы ресурстары тиімді таралады [1].
