Діни экстремизм – белгілі бір діннің қағидаларын бұрмалап түсіндіру арқылы адамдарды алдау, өз сенімін күштеп таңу немесе зорлық-зомбылыққа итермелеу әрекеті. Мұндай құбылыс қоғамдағы бейбітшілік пен келісімге қауіп төндіріп, халықтың бірлігін бұзуға бағытталады. Діни экстремизм көбінесе дінді саяси мақсатта пайдалану, зорлық-зомбылықты ақтау, өзге сенім өкілдеріне төзімсіздік таныту және жастарды арбау арқылы көрініс табады. Әсіресе әлеуметтік желілер мен интернет кеңістігінде жалған уағыздар мен радикалды идеялар жастардың санасына теріс ықпал етуі мүмкін. Оның зардаптары да ауыр: халық арасында алауыздық туындап, ұлттық құндылықтар әлсірейді, жастар дәстүрлі мәдениеттен алыстайды, ал ең бастысы – мемлекеттің тұрақтылығы мен қауіпсіздігіне қатер төнеді. Қазақстан зайырлы мемлекет болғандықтан, діни экстремизмнің кез келген түріне заң жүзінде тосқауыл қойылған. «Діни қызмет және діни бірлестіктер туралы» заң діни қатынастарды реттеп, қоғамдағы тұрақтылықты сақтауға бағытталған. Сонымен бірге мемлекет тарапынан арнайы бағдарламалар іске асырылып, ақпараттық-түсіндіру топтары мен бұқаралық ақпарат құралдары арқылы халықтың діни сауаттылығын арттыру жұмыстары жүйелі түрде жүргізілуде. Діни экстремизмге қарсы күрес тек мемлекеттік құрылымдардың ғана емес, бүкіл қоғамның ортақ міндеті болып табылады. Әрбір азамат өз діни сауаттылығын жетілдіріп, жалған уағыздарға қарсы тұруға тиіс. Тек осылай ғана біз бейбітшілік пен келісімді сақтап, келешек ұрпаққа тұрақты әрі жарқын болашақ сыйлай аламыз.
Экстремизмге қарсы – ел ертеңі үшін
